ILOILO CITY – Pormal na nga gin-refer sa plenary ang report no. 3 sang Senate Blue Ribbon Committee nga naga-unod sang findings sang panel sa isyu sa sugar importation.
Ang report ang nagarekomendar sa Office of the Ombudsman sang pag-file sang complaints batuk kanday suspended Agriculture official Leocadio Sebastian kag resigned Sugar Regulatory Administration chief Hermenegildo Serafica kag anay board member sang ahensya nga sanday Roland Beltran kag Aurelio Valderrama.
Suno sa report, ang apat ka mga opisyal ang nagkomiter sang “serious dishonesty, grave misconduct, gross neglect of duty, conduct prejudicial to the best interest of the service, kag gross insubordination sa idalom sang revised rules sa administrative cases sa civil service.”
Ang komitiba ang naga-rekomendar sang mga masunod nga charges nga i-file batuk sa ila:
-One count sa paglapas sa Section 3A sang Republic Act 3019 ukon Anti-graft and Corrupt Practices Act
-One count sa paglapas sa Section 3E sang Anti-graft and corrupt practices act
-One count sa paglapas sa provision sang Republic Act 10845 ukon Anti-Agricultural Smuggling Act of 2016
-One count sa usurpation functions defined and penalized sa idalom sang Article 177 sang Revised penal code.
Sa speech ni Senator Francis Tolentino nga amo ang chairman sang panel, ang “politicization of issues” ang gindula kadungan sang inquiry may kaangtanan sa pagpagwa sang Sugar Order No. 4 nga gindeklarar nga iligal sang Malacañang.
Ang 75 ka pahina nga report ang nagatuyo nga mahatagan sang proteksyon ang interes sang ginabanta “800,000” sugar farmers.
Ini ang ginpirmahan sang 14 sa 17 ka mga myembro.
Suno pa sa panel, kinahanglan ang pag-amyendar sang Executive Order Number 18 nga nagatukod sang Sugar Regulatory Administration ilabi na ang expansion sang Board lakip na ang mga tigalawas sang industrial kag household consumers, sugar industry workers, sugar transportation sector, kag iban pa nga mga stakeholders sa sugar industry.
Ginadumilian man sini ang pag-delegate sang otoridad sa board sang ahensya agud nga mag-reclassify sang kalamay.
Kinahanglan man nga i-review ang kag i-rationalize ang importation policy sang pungsod.
Nagpanawagan ang kominitiba sang mas transparent kag sang accountability sang mga ahensya nga may kaangtanan sa sugar importation.
Ang pila ka mga senador nga nagpirma sang committe report amo sanday Tolentino, Cynthia Villar nga head sang agriculture committee; Blue Ribbon vice chairmen Ronald “Bato” dela Rosa kag Christopher “Bong” Go; Mga myembro nga sanday Sherwin Gatchalian; JV Ejercito; Jinggoy Estrada; Imee Marcos; Raffy Tulfo; Robinhood Padilla, kag Senate President Juan Miguel Zubiri.
Si Senator Risa Hontiveros ang nagpirma apang may note pa nga magasumite man sila sang isa ka Minority Report.
Sanday Senators Pia Cayetano kag Sonny Angara ang nagpirma apang may yara man sang nakabutang nga note nga may nakasulat nga “may interpellate” kag “for further debate.”
Ang mga wala nagpirma amo sanday Alan Peter Cayetano, Ramon “Bong” Revilla, Jr., Grace Poe, Manuel “Lito” Lapid, Nancy Binay kag Francis Escudero.
Ang mga Ex-officio members nga wala man nagpirma amo sanday Senate Minority Leader Aquilino “Koko” Pimentel III, Majority Leader Joel Villanueva, kag Senate President Pro Tempore Loren Legarda.
Gin-suspend sang senado ang period of interpellation para sa report agud nga mahatagan sang nagaka-igo nga tyempo ang mga myembro nga tin-on ini.
Natalana naman nga magsapubliko sang ila report sa amo nga issue ang Minority bloc.
