Iloilo City – Magapatawag si Iloilo City Mayor Jerry Treñas sang pagsinapol subong nga adlaw agud diskusyunan ang mahatag nga solusyon sa problema sa kontrobersyal nga Ungka flyover.
Sa interview sang Bombo Radyo kay Treñas, iya ginpahayag nga imbitado ang tanan nga magtambong bangud wala sang dapat taguon sa publiko tuhoy sa problema sang depektibo nga flyover.
Lakio sa mga magatambong sa pagsinapol amo ang mga tiglawas sang Land Transportation Franchising and Regulatory Board, Public Safety and Transportation Management Office, kag si Pavia, Iloilo Mayor Luigi Gorriceta.
Ang problema sa Ungka flyover ang nakaangkon sang negatibo nga reaksyon halin sa mga transport groups kag commuters bangud sa trapiko nga tuga sini.
Matandaan nga sang nagligad nga Sabado, nagpatigayon sang ocular visit sa flyover ang Ilonggo lawmaker nga si Rep. Raoul Danniel Manuel sang Kabataan Partylist.
Ginpahayag sini nga maga-file siya sang resolution agud nga makapatigayon sang inquiry ang Kamara sa kontrobersyal nga P680-million Ungka flyover kasunod sang iya nga public consultation kaupod sa mga driver, commuters, kag mga residente nga nagapuyo malapit sa project.
