ILOILO CITY – Malipayon ang ginkoronahan nga Miss Iloilo First runner-up matapos napilian nga magatiglawas sang syudad sa Miss Universe Philippines.
Sa ginpatigayon nga sashing ceremony, si Miss Iloilo First runner-up Chloei Darl Gabales sang Jaro nga naghakot sang kadam-an nga special kag minor awards lakip na ang Best in Swimsuit, Best in Swimwear Underwater Shoot, kag Best in Evening Gown Award ang maga-represent sang Iloilo sa Miss Universe Philippines.
Ang second runner-up nga si Tracy Lois Bedua sang Barotac Nuevo ang maga-represent sa syudad sa Binibining Pilipinas.
Samtang, ang ginkoronahan nga Miss Iloilo 2023 nga si Raniele Shaine Saulog ang napili-an nga maga-represent sa Miss World Philippines.
Pagkatapos sang coronation night sang Enero 18, nagpatigayon sang deliberation ang 11 ka mga judges kag ginpili-an sa tatlo ka mga beauties kun sin-o ang magapasakop sa tagsa ka national pageant.
Sa interview sang Bombo Radyo kay Chloei Darl, iya ginpahayag nga sang pagsugod pa lamang sang competition, ginhandom na niya nga makuha ang Miss Iloilo- Universe.
Nagpromisa man ini nga himuon ang tanan agud nga makuha ang crown para sa Iloilo City kag padayunon ang training agud nga makalab-ot sa international stage.
Padayunon sa gihapon ni Chloei ang iya advocacy nga pag-promote sang business sustainability.
Samtang, para naman kay Tracy Lois Bedua nga maga-represent sa syudad sa Binibining Pilipinas, wala siya naglaum nga makasulod sa top 5.
Apisar sini, thankful man siya sa gihapon nga i-represent niya indi lang ang iya banwa kundi ang syudad sa national level.
Nagpromisa man ini nga masaksihan sang mga Ilonggo ang mas maisog kag mabaskog nga inday sa Binibining Pilipinas.
Wala naman ginhandum ni Miss Iloilo 2023 Raniele Shaine Saulog ang title nga Miss Iloilo Universe gani, malipayon ini nga napilian siya nga maga-represent sang syudad sa Miss World Philippines.
Suno sa iya, mangin siya ang wala man naga-manifest nga makuha ang Miss Iloilo World apang madamo sang nagahambal suno sa iya nga bagay siya sa amo nga pageant.
Sa national pageant, padayunon niya sa gihapon ang iya advocacy nga mental kag emotional wellnes.
