ILOILO CITY – Nagaplano ang gobyerno sang Pilipinas nga mag-apela sa International Criminal Court Appeals Chamber may kaangtanan sa pagbalik sang imbestigasyon sa kontrobersyal nga drug war sa idalom sang administrasyon ni anay Presidente Rodrigo Duterte.
Ini ang kasunod sang pagpahanugot na sang International Criminal Court nga liwat nga buksan ang imbestigasyon bangud nga indi kuntento ang pre-trial chamber sa ginapatigayon nga imbestigasyon sang Pilipinas.
Suno kay Solicitor General Menardo Guevarra, wala pa nila nabaton ang official copy sang resolution apang gusto nila nga i-emphasize nga apisar sang structural kag resource limitations sa legal system, naga-function ini sa gihapon kag may positibo nga resulta.
Nahibaluan nga nagdangat sa linibo ka mga durugista ang ginpamatay sa anti-drug crackdown ni Duterte humalin sang Nobyembre 2011 tubtub Marso 2019.
Ginsuspendi ang imbestigasyon sang 2021 matapos nagdesisyon ang Manila nga amo ang malunsyar sang kaugalingon nga imbestigasyon, kadungan sang panindugan nga wala sang jurisdiction ang International Criminal Court sa war on drugs.
Ginmando man sadto ni Duterte ang paghalin sang Pilipinas sa the Hague-based tribunal sang 2019 matapos ang preliminary investigation.
Kun balik-balikan ang statement nga ginpaguwa sang International Criminal Court Pre-Trial Chamber, ginhatagan na sang go signal ang request ni Prosecutor Karim Khan nga padayunon ang pag-imbestigar sa sitwasyon sa Pilipinas bangud sandig sa analysis sang chamber, indi kumbinsido ang international court nga wala nagapatigayon ang Pilipinas sang kaugalingon kag relevant nga imbestigasyon.
Kun naga-conduct kuntani sang relevant nga imbestigasyon ang Pilipinas, amo ini kuntani ang basehan agud nga ipaiway na sang International Criminal Court ang ila pag-intra sa imbestigasyon sa basis sang complementarity principle.
Ginpahayag pa sang Hague-based international tribunal nga “indi konkreto, indi tangible, kag indi progresibo” ang imbestigasyon sa Pilipinas.
Pirmado man ni Solicitor General Guevarra kag sang lima ka assistant solicitors general ang argumento nga gina-imbestigaran sang Philippine government kag gin-prosecute ang gina-alegar nga mga krimen.
Ginpangbali naman ni Prosecutor Khan ini nga mga argumento.
Sa iya sabat, ginpahayag sini nga napaslawan ang Pilipinas nga i-substantiate ang claim nga naga-function ang Philippine justice system.
