ILOILO CITY- Duha ang dead on the spot kag isa ang pilason matapos natumba ang isa ka motorsiklo kag nakabunggo pa sa nasugata nga salakyan sa Brgy. Caw-i, Batad, Iloilo.
Ang mga napatay amo sanday John Rodjen Nacionales,driver kag angkas nga si Edles Aresto samtang pilason naman ang isa pa ka angkas nga si Kenneth Soliva.
Sa interview sang Bombo Radyo kay PCpt. Jaype Silvestre, hepe sang Batad Police Station, iya ginpahayag nga halin sa Batad kag padulong sa San Dionisio ang mga biktima.
Suno kay Silvestre, base sa panaysayon ni Soliva, nadulaan sang kontrol ang driver kag nakalumpat na ini antes pa man natumba ang motorsiklo kag nakabunggo sa isa ka salakyan.
Gintuad man ni Soliva nga nakainom sang makahulubog nga ilimnon si Nacionales.
Lunsay wala sang suksok nga helmet ang mga biktima rason nga patal nga pilas sa ulo ang ila naagom.
Ginkustodiya naman sang otoridad ang driver sang pribado nga salakyan nga amo ang nabungguan sang motorsiklo.
