ILOILO CITY- Nahangpan sang Presidente sang Liga ng mga Barangay sa Zarraga, Iloilo ang nangin reaksyon sang Parish Administrator sang St. Isidore Parish Church may kaangtanan sa ginpatigayon nga Bikini Open sa pila ka mga barangay sa banwa kadungan sang ila kapiestahan.
Ini matapos gintawag ni Rev Father Rogelio Palmos Jr. nga wala pulos kag indi batasan sang Kristiano ang ginpatigayon nga Bikini Open bangud halos nagauba na ang mga contestants.
Sa interview sang Bombo Radyo kay Punong Barangay Nelida Octaviano, Liga President sang Zarraga, Iloilo, iya ginpahayag nga sa iya bahin, nadismaya man ini bangud nagpaandam na ini sadto sa tanan nga barangay sa banwa nga indi gid magpatigayon sang kaangay nga aktibidad.
Suno kay Octaviano, sang nagligad nga Enero, una na naghiwat sang Bikini Open ang Barangay Gines kag bangud may nagpalab-ot sang reklamo, gindumilian na sini ang iban nga barangay sang kasubong nga event.
Apang suno kay Octaviano, nakibot na lang ini nga sang Sabado, nagpatigayon man sang Bikini Open ang Barangay Tuburan.
Pahayag niya, nagpangayo man sang pasaylo ang punong barangay sang Tuburan bangud sa pagpahanugot nga matigayon ang amo nga aktibidad.
