ILOILO CITY- Nakit-an na sang mga police ang nadula nga ulo sang Hong Kong socialite kag influencer nga si Abby Choi.
Suno sa otoridad, nakit-an ang ulo sa isa sa duha ka kaldero nga nagaunod sang sopas kag lawas sang tawo, pila ka adlaw matapos nadiskubrehan ang brutal nga pagpatay sa iya.
Magluwas sa ulo, nakit-an man ang ribs sini sa isa ka kaldero sa kusina sang apartment kun sa diin ini ginpatay.
Sa subong, lima na ang gin-detain nga suspek matapos nga gindakop man ang lover sang former father-in-law sang biktima.
Una na nga gin-aresto ang iya ex-husband kag mga ginikanan sini kag isa ka utod.
Matandaan nga nadiskubrehan ang ginpang-chop-chop nga lawas sini sa isa ka apartment sa village sang Lung Mei Tsuen kun sa diin nakit-an sa sulod sang refrigerator ang iya mga paa, samtang ginapangita pa ang iban nga parte sang iya lawas.
Nakit-an sa amo nga apartment ang meat grinder, choppers, hammer, kag electric saw.
Ginapahayag nga ginluto pa ang iban nga parte sang iya lawas matapos may nakit-an nga unod sang tawo sa kaldero sa amo nga apartment.
Ang amo nga apartment ang ginrentahan kag gin-istaran sang iya ex- father in law duha ka semana ang nagligad antes ang krimen.
Nakit-an naman sa surveillance video ang isa sa mga suspects nga may dala nga container kag ginsulod sa van kag posible nagaunod sang iban nga parte sang lawas sang biktima.
Nahibaluan nga si Abby kag ang iya ex-husband ang may duha ka kabataan antes sila nag-divorce kag nagpakasal sa iya bag-o nga bana sang 2016, nga anak sang founder sang Tam Jai International nga isa ka restaurant chain.
Ginapahayag nga may away angot sa kwarta nga nagabalor 17 million US dollars sa tunga ni Choi kag sang pamilya sang iya anay bana.
