Iloilo – Ginpabugal sang Police Regional Office 6 ang listahan sang nangin accomplishments sang talatapan sa special week-long simultaneous anti-criminality operations ukon “Birada Semana” sang Pebrero 20-26, 2023.
Sa interview sang Bombo Radyo kay Police Major Mary Grace Borio, spokesperson sang Police Regional Office 6, iya ginpahayag nga sa ila kampanya sa pagkadakop sang wanted persons sa Western Visayas, 239 ang nadakpan sa 226 nga ginpatigayon nga operasyon.
Sa numero nga ini, 48 ang mga most wanted persons, kag 191 ang mga wanted persons.
Suno kay Borio, sa bahin naman sang kampanya batok sa iligal nga droga, nagpatigayon ang kapulisan sang 66 ka mga operasyon kun sa diin 80 ka mga durugista ang nadakpan.
Narekober sang kapulisan ang 1119.3 grams sang shabu kag 3 grams sang marijuana nga may standard drug price nga nagdangat sa P6,987, 386.
Ginpahayag dugang sang natungdan nga sa illegal gambling, 208 ang naaresto.
Kaangot diri, ginpanginbulahan ni Police Brigadier General Leo Francisco, Director sang Police Regional Office 6 ang tanan nga units sa Western Visayas sa nangin kontribusyon sang mga ini sa mga talalupangdon nga accomplishments.
