Masobra na sa 137,000 ka mga residente sa Mimaropa kag Western Visayas ang apektado sang oil spill halin sang naglugdang ang motor tanker nga may karga nga 800,000 litro sang industrial fuel sa kadagatan nga sakop sang Naujan, Oriental Mindoro.
Suno sa Department of Social Welfare and Development (DSWD), 121 ka barangays sa MIMAROPA kag Region 6 ang apektado sang nagtagas nga langis.
Nakapaguwa na ang ahensya sang P10,985,250 nga balor sang food kag non-food items. Nag-umpisa naman ang ahensya sa cash-for-work program sa affected areas sa Mimaropa.
May yara man sang financial assistance paagi sa Assistance to Individuals in Crisis Situation program (AICS).
Matandaan nga gin-report sang Philippine Coast Guard (PCG) nga naglab-ot na ang oil spill sa Taytay, Palawan nga 159 nautical miles ukon roughly 300 kilometers ang kalayuon halin sa Naujan, Oriental Mindoro.
Gina-project sang mga eksperto halin sa University of the Philippines’ Marine Science Institute nga makalab-ot pa ini nga oil spill sa northern Palawan. ##
