Ginakahangaw-an pa nga labi nga magsaka ang numero sang napatay kasunod sang pagkasunog sang isa ka passenger vessel sa Basilan.
Sa listahan sang Philippine Coast Guard, 29 na ang kumpirmado nga casualties.
Sa masobra 200 nga sakay sang MV Lady Mary Joy 3, ginpahayag sang coast guard nga 29 ka pasahero ang patay, 196 ang na-rescue kun sa diin 36 ang crew members samtang 160 ang pasahero.
Padulong ang MV Lady Mary Joy 3 sa Jolo, Sulu kag halin sa Zamboanga City sang Myerkules sang nasunog ini malapit 11:00 sa gab-i.
Aga na sang Huwebes sang gin-deklarar nga fire out.
Ginpahayag nga gindala pa sang kapitan sang barko ang maritime vessel sa Baluk-Maluk Island sa Hadji Muhtamad town agud nga maluwas ang mga pasahero.
Nagapadayon ang maritime casualty investigation agud matumod ang rason sang sunog apang kun basehan ang una nga pahayag sang mga nakaluwas, nag-umpisa sang kalayo sa airconditioned cabin sang vessel.
Kumpirmado man nga indi ini overloaded bangud makasarang ini magsakay sang 430 ka mga tawo.
Wala naman sang na-report nga oil spill pagkatapos sang insidente.
