Indi na mag-import sang bugas ang National Food Authority para sa buffer stock sang pungsod.
Suno kay Agriculture Undersecretary for policy, planning and regulations Mercedita Sombilla, nag-abiso ang ahensya sa NFA nga magkuha sang suplay sang bugas halin sa local farmers sa baylo nga mag-import.
Antes sini, una na nag-rekomendar ang NFA sang importasyon sang 330,000 metric tons sang bugas para sa buffer stock nga amo ang pwede magamit para sa mga kalamidad.
Sunod ini nga ginpakamalaot sang mga kritiko bangud maathag ini nga paglapas sa Rice Liberalization Law.
Sa amo nga layi, nakasaad nga mahimo lamang makakuha sang bugas ang NFA sa local farmers.
Sa pihak nga bahin, ginsabat man sang ahensya ang paandam ni Federation of Free Farmers national manager Raul Montemayor nga posible matabo liwat subong nga 2023 ang natabo nga rice crisis sang 2018 sa idalom anay sang Duterte administration bangud sa pagsaka sa presyo sang bugas kag nagkulang ang suplay.
Suno kay Sombilla, may bastante nga suplay sang bugas tubtub sa katapusan sang tuig.
Apisar nga ginalantaw nga may bulan nga puraot ang suplay sa third quarter, ginalauman naman suno sa opisyal nga magabawi ini sa foruth quarter bangud magadungan na ini sa tig-alani ukon harvest season.
Ang kabug-usan nga suplay sa katapusan sang tuig — lakip na ang imports sang pribado nga sektor — ang mahimo maglawig sang 45 ka adlaw suno pa sa natungdan.
