ILOILO CITY – Liwat na naman nga ginkawatan ang Iloilo Central Market.
Nagapadayon pa ang imbestigasyon sang mga otoridad matapos nga gin-ransack ang electrical room kag pwesto sang nagabaligya sang ubod malapit sa meet shop sang nasambit nga merkado.
Sa interview sang Bombo Radyo kay Lea Salvo, market-in-charge sa Iloilo Central Market, iya ginpahayag nga ginsulod sang wala pa mahibaluan nga kawatan ang electric room kag ginguba ang kandado.
Diri na kag nakuha sang kawatan ang electric tools, gas stove kag branded nga relo.
Magluwas diri, ginkawatan man ang baligyaan sang ubod sa diin nakuha ang duha ka kutsilyo kag electric sander.
Suno kay Salvo, wala sang nakahamtang nga closed circuit television (CCTV) sa merkado.
Kun balik-balikan, gin-ransack man sang nagligad nga semana ang isa ka shoes and bags repair shop sa Iloilo Central Market nga ginapanag-iyahan ni Irene Iragana.
Diri kag nadula ang cellphone kag laptop nga nabilin nila sa shop.
Sa subong, padayon pa nga ginahibalo sang mga otoridad ang identity sang mga nagkawat kag kun may kaupdanan ini nga nagpangamot sang pagpangawat sang nagligad nga semana sa nasambit nga merkado.
