Elementary school sa Guimaras, nakatipon sang malapit P2 million sa ila aktibidad

ILOILO CITY- Gamiton sa pagpatindog sang pader sang eskwelahan ang natipon nga malapit 2 million pesos sang Sinapsapan Elementary School sa Jordan, Guimaras paagi sa ila aktibidad nga Mr. and Ms. Sinapsapan.

Sa interview sang Bombo Radyo kay Mrs. Mae Lou Tanaleon Pugaja, Head Teacher 4-Officer in Charge sang Sinapsapan Elementary School, iya ginpahayag nga dako ini nga bulig para mapanami pa nila ang eskwelahan kag ma-improve ini ilabi na ang pader bilang dugang nga seguridad sa mga estudyante.

Gin-ako naman ni Pugaja nga tubtob subong, halos indi pa ini makapati nga nakatipon sila sang amo ka dako nga kantidad pinaagi lamang sa isa ka simple nga aktibidad sang buluthuan.

Dako naman ang iya pagpasalamat sa tanan nga nagbuylog kag nagpakita sang kaalwan nga wala nagduha-duha nga maghatag sang dalagko nga donasyon.

Patigayunon naman ang coronation sang Mr. and Ms.Sinapsapan sa Mayo 6,2023.