Wala ginapanan-aw ni President Ferdinand ‘Bongbong’ Marcos Jr. nga masulit subong nga 2023 ang rice crisis nga natabo sa 2018.
Ini apisar may paandam na nagikan sa grupo sang mga mangunguma nga posible matabo ini nga krisis bangud sa nagasaka nga presyo sang bugas kag ang ginapahayag kakulangan sa suplay.
Suno naman sa presidente, may tyansa nga magnipis gid man ang suplay amo nga ginalantaw gid sang maayo ang lebel sang produksyon; apang kun mag-abot naman ang tag-alani, wala na sang mangin problema sa suplay.
Antes sini, ginpahayag sang Federation of Free Farmers nga magakulang ang suplay sang bugas sa pungsod halin sa Hulyo tubtub sa Septyembre.
Apang gin-athag ni Marcos nga bukas sa gihapon ang opsyon nga mag-import sang bugas.
Apisar ginpasigurado sini nga bastante ang suplay kag mangin estable ang presyo sini, gin-mensyonar sini nga may mga bagyo kag lockdowns nga ginpatuman nga nagpanubo sa buffer stock sang National Food Authority (NFA).
Suno kay Marcos, ginatun-an na subong kun paano mabalik ang buffer stock samtang nagatuman sa layi nga dapat nga local farmers kuhaon ang buffer stock.
Matandaan nga sang nagligad nga adlaw, gin-anunsyo na sang isa ka Department of Agriculture undersecretary nga ginbawi na sang NFA ang plano sini nga mag-import sang 330,000 metric tons sang bugas.
