Nagpakig-angot si former Bureau of Corrections (BuCor) chief Gerald Bantag sa isa ka Cabinet member sang Marcos Jr. administration kag nagpahayag sang intensyon nga magsungka sa otoridad.
Ginbuyagyag ini ni Justice Secretary Jesus Crispin Remulla isa ka semana matapos naglunsar ang Criminal Investigation and Detection Group (CIDG) sang manhunt para kay Bantag kag former deputy officer Ricardo Zulueta bangud sa gin-alegar nga kahilabtanan sa pagpatay sa broadcaster nga si Percy Lapid.
Suno kay Remulla, isa ka semana na ang nagligad sang nagtawag si Bantag sa amo nga Cabinet member.
Gin-athag man sang tiglikom nga wala sang ginplastar nga mga kondisyon kun magsungka si Bantag bangud nakahibalo man ini nga mabudlay panaguan kag palagyuhan ang layi.
Nagapati man ang justice secretary nga yari pa si Bantag sa Pilipinas bangud sang ginpapanaog nga hold departure order kasunod sang warrants of arrest halin sa Muntinlupa kag Las Piñas courts.
Sanday Bantag kag Deputy Zulueta ang ginatudlo nga nagpapatay man sa New Bilibid Prison inmate nga si Jun Villamor nga amo ang ginatudlo nga middle man sa pagpatay kay Lapid ukon kay Percival Mabasa sa matuod nga pangalan.
