Gin-alegar ni suspended Negros Oriental Rep. Arnolfo Teves Jr. nga may duha ka opisyal sang gobyerno nga nagmandu agud nga ipapatay siya.
Kasunod ini sang iya sulit-sulit nga panindugan nga indi siya magbalik sa Pilipinas agud pisikal nga atubangon ang mga akusasyon batok sa iya kaangot sa natabo nga asasinasyon kay Negros Oriental governor Roel Degamo.
Nagpamalibad si Teves nga hingadlan kun sin-o ang duha ka opisyal sang gobyerno bangud posible suno sa iya nga pasakaan siya sang kaso nga libel.
Wala man sini gin-detalye kun elected officials ang iya nga buot silingon, apang gin-athag sini nga indi man sila magkaaway sa pulitika.
Ginpahayag man sini nga ang instructions nga i-raid ang iya balay kag magtanum sang ebidensya ang nagikan man mismo sa sini nga mga opisyal.
“People’s lives are intertwined and almost everyone knows everybody. There is no secret that you can keep forever. The information has been leaked. The instruction is: raid my house and plant an incriminating evidence. Lately have I known there was a plot to kill me… Government officials, two of them. These are high-ranking officials,” pahayag ni Teves.
Suno sa mamalidha, nagsala lang ang iya ginatumod nga government officials bangud direkta nila nga ginhatag ang mandu nga ipapatay siya, kag may connections siya rason nga natukiban niya ini.
Una na nga ginpahayag ni Teves nga wala na siya nagalaum nga mangin patas ang trial sa Pilipinas bangud wala pa man natapos ang imbestigasyon, siya na ang ginatudlo ni Justice Secretary Boying Remulla nga mastermind kag executive producer sa Degamo assassination.
