ILOILO CITY – Nagalalain ang mga vendors matapos ginpahalin na ang mga ini sa ila temporaryo nga pwesto sa Cacho Property sa JM Basa, Iloilo City Proper.

Sa interview sang Bombo Radyo kay Thelma Lobaton, isa sa mga ginpahalin nga vendor, iya ginpahayag nga 57 sila ka mga manugbaligya ang ginpahalin sa lugar.

Suno kay Lobaton, wala sila sang pahamtangan sang ila pwesto bangud indi man sila mahimo nga makabaligya sa kilid sang dalan sa syudad ilabi na sa weekdays.

Ginpahayag sini nga Sabado, Dominggo kag Holidays lang sila mahimo makabaligya sa sidewalk.

Tungod sini, halos indi na sila makabakal sang ila mga kinahanglanon sa sulod sang ila panimalay.

Nagapanawagan man ang natungdan sa Iloilo City Government nga hatagan sang solusyon ang ila problema.