ILOILO – Temporaryo nga ginabalabagan ang pagpasulod sang poultry imports halin sa Chile pakadto sa Pilipinas.
Ini matapos nga nagdeklarar ang bug-os nga kontinente sang South America nga ginalakipan sang Chile nga yara ini sa idalom sang bird flu outbreak.
Sa ginpagwa nga memorandum order sang Department of Agriculture, ginadumilian ang pag-import sang domestic kag wild birds nga ginalakipan sang poultry meat, day old chicks kag itlog halin sa Chile.
Buot silingon, ang ahensya ang nag-suspend gilayon sang processing, evaluation sang applications kag issuance sang sanitary kag phytosanitary import clearances.
Nahibaluan nga ang Chile ang naga-deliver sang 2.9 million kilograms sang manok sa Pilipinas as of March.
Matandaan nga ang Pilipinas man mismo ang nagapakig-away batok sa bird flu.
Suno sa ulihi nga report sang Bureau of Animal Industry, ang IIocos Region kag Central Luzon ang apektado sa gihapon sang avian influenza as of March 31.
