Tatlo ang pilason matapos aksidente nga napalupok sang Russia ang bomba sa kaugalingon man nga syudad nga malapit sa Ukraine.
Sa video footage, makit-an nga halin ang bomba sa Russian Sukhoi-34 supersonic warplane kag ang sunod amo ang pagsigabong sang kalye kag ang nagkalaguba nga mga salakyan kag building.
May isa pa ka salakyan nga nagtabog pakadto sa atop sang isa ka balaligyaan.
Sunod nga nagdeklara si Belgorod region governor Vyacheslav Gladkov sang state of emergency bangud sa amo nga insidente kag sunod man nga ginpa-evacuate ang mga tawo.
Nag-depensa naman ang Russian defence ministry nga aksidente nga nabuy-an halin sa Su-34 supersonic fighter-bomber jet ang bomba sang nagalupad ini sa ibabaw sang syudad sang Belgorod.
Wala na gin-mensyonar kun ano nga klase sang bomba ang involved sa amo nga insidente.
Ginpasalig man sang defense ministry nga may patigayunon nga imbestigasyon.
