Ginbuyagyag ni Justice Secretary Jesus Crispin Remulla nga nagpalagyo ang mga suspek sa Degamo assassination halin sa Negros Oriental sakay sa chopper nga ginapanag-iyahan ni suspended Negros Oriental Rep. Arnolfo Teves Jr.
Suno sa tiglikom, kasunod sang Marso 4 nga asasinasyon, gin-transport ang mga suspek halin sa Negros Oriental padulong sa Maguindanao.
Ini ang isa sa mga rason suno kay Remulla kun ngaa ginapatihan nga may labot si Teves sa krimen bangud iya mismo nha chopper ang ginsakyan sang mga suspek.
Kun matandaan, una na nga ginpahayag ni Remulla nga ang isa pa ka mastermind nga si Marvin Miranda nga isa man anay ka aide ni Teves, ang naggamit sang helicopter nga may marka nga “Teves Cares” agud nga makahalin ini sa Negros Oriental.
Si Miranda man ang gintumod nga nag-recruit sang gunmen kag amo man ang nagbakal sang mga armas nga ginpatay kay Degamo kag nagdalahig sa walo ka iban pa nga mga sibilyan.
Ginpahayag man ni Remulla nga may yara na sang ginpaguwa nga search warrant para pangitaon ang amo nga chopper kag may gin-request man nga piloto agud na madala ini sa kustodiya sang Philippine National Police.
Matandaan nga sulit-sulit nga nagapanginwala si Teves nga may kahilabtanan ini sa Degamo assassination. Una naman sini nga ginhangkat si Remulla nga magpasaka sang kaso kun may bastante nga ebidensya ang Department of Justice nga makapamatuod sang sini nga mga alegasyon batok sa mamalidha.
