ILOILO CITY – Nadakpan ang 11 tanan ka mga durugista sa ginpatigayon nga drug buy-bust operation sa Barangay Desamparados, Jaro, Iloilo City.
Ang mga arestado amo sanday Roberto Latoza, 26, subject sang operasyon kag ginakabig nga high value individual, nagatrabaho bilang construction worker kag residente sang Barangay San Isidro, Jaro, Iloilo City.
May 10 ka iban pa nga nadakpan lakip na ang 16-anyos nga menor de edad nga lalaki.
Sa interview sang Bombo Radyo kay Police Captain Val Cambel, team leader sang Iloilo City Drug Enforcement Unit, iya ginpahayag nga narekober sang mga otoridad ang P7,000 nga drug buy-bust money, 11 tanan ka mga sachet sang suspected shabu nga nagabug-at sang 60 grams nga may standard drug price nga nagdangat sa P408,000.
Suno kay Cambel, preso na tanan sa Jaro Police Station ang mga nadakpan kag magaatubang sang kaso sa paglapas sa Republic Act 9165 ukon “Comprehensive Dangerous Drugs Act of 2002”.
Samtang, ang menor nga nadakpan ang ginturn-over sa Iloilo City Social Welfare and Development Office.
