ILOILO CITY – Ginkoronahan bilang Miss Universe Philippines 2023 ang pageant veteran nga si Michelle Dee.
Ginbuslan ni Michelle si Celeste Cortesi bilang Miss Universe Philippines.
Samtang, si Pauline Amelinckx sang Bohol ang ginkoronahan bilang Miss Supranational Philippines kag maga-represent sa Pilipinas sa inetrnational stage.
Si Krishnah Gravidez sang Baguio naman ang Miss Charm Philippines nga separado nga ginkoronahan.
Lakip sa final 5 amo sanday Christine Opiaza sang Zambales nga amo ang first runner up kag Angelique Manto sang Pampanga nga amo ang second runner up.
Sa duha ka rounds sang question and answer portion, ginpamangkot si Michelle may kaangtanan sa pag-close sang gap sa tunga sang manggaranon kag pigado sa pungsod.
Suno sa former Miss World Philippines, ang edukasyon ang pinakamaayo nga pamaagi agud nga ma-address ang issue.
Samtang, ginpadayaw man sini ang mga Filipinos nga amo ang pinakamaayo nga ma-offer sa kalibutan sang ginpamangkot sa iya komento sa bag-o nga Tourism Department’s slogan.
Ang competition ang nag-angkun sang technical issues nga nagresulta sang tuman ka lawag nga delay sa program.
Matapos ang pag-anunsiyo sang dapat top 10 finalists, gin-anunsiyo nga ang tanan nga 18 semi-finalists ang liwat nga maga-compete sa ila evening gowns.
Ang nag-host sa event amo ang actors nga sanday Xian Lim kag Alden Richards nga gin-updan ni Miss Universe 2019 Zozibini Tunzi.
Ang anay “American Idol” finalist nga si Jessica Sanchez ang nag-perform sa event.
Yara man ang presensya ni Miss Universe 2022 R’Bonney Nola Gabriel.
Si Michelle ang naga-intra na sa pageant sa sulod sang pila ka tuig kun sa diin, nag-compete na ini sa Miss World 2019 kag nakasulod sa Top 12.
Liwat ini nga nag-intra sa Miss Universe Philippines 2022 nga ginlutos ni Celeste Cortesi kag nakuha ang Miss Universe Philippines Tourism 2022 title.
Iga-represent sang actress ang Pilipinas sa masunod nga Miss Universe edition sa El Salvador.
