ILOILO CITY – Nagadangat sa 16 ka mga piers sang kontrobersyal nga P680-million Ungka Flyover ang nag-usmod.
Sa interview sang Bombo Radyo kay Pavia, Iloilo Sangguniang Bayan Member Jose Maria “Pyt” Trimañez, Chairman sang Committee on Transportation sa konseho, iya ginpahayag nga samtang nagadugay, mas nagalala ang pagka-usmod sang mga pier.
Suno kay Trimañez, ang mga piers sang flyover nga nakitaan sang vertical displacement amo ang Pier 1 nga may paghulag sang 82 mm, Pier 2 – 151 mm, Pier 3 – 150 mm, Pier 4 – 431 mm, Pier 5 – 583 mm, Pier 6 – 488 mm, Pier 7 – 20 mm, Pier 8 – 17 mm, Pier 9 – 21 mm, Pier 10 – 20 mm, Pier 11 – 70 mm, Pier 12 – 88 mm, Pier 13 – 114 mm, Pier 14 – 41 mm, Pier 15 – 51 mm kag Pier 16 – 27 mm.
Ginpahayag sang natungdan nga magalawig pa sang 10 ka bulan antes makaayo ang flyover nga magakinahanglan sang dugang naman nga pondo nga P250-million.
Samtang, magapatigayon naman sang pagsinapol ang Sangguniang Bayan sang Pavia kaupod sang Department of Public Works and Highways, kag Iloilo City Public Safety and Transportation Management Office sa Mayo 29 agud usisaon ang nagakaigo nga solusyon kag traffic plans sa Ungka Flyover.
Nagapanawan naman si Trimañez sa mga ilonggo nga Kongresista nga maghimo sang tikang agud masolbar ang problema sa kontrobersyal nga flyover.
