Respetuhon sang prosecution team ang mangin desisyon sang Senate impeachment court nahanungod sa voting threshold nga pagagamiton sa paghatag sang desisyon sa impeachment trial ni Vice President Sara Duterte.
Suno kay Akbayan Party-list Representative Chel Diokno, indi ang kadamuon sang boto para sa conviction ang sentro sang ila atensyon, kundi ang pagpresentar sang mabakod nga ebidensya para suportahan ang kaso batok kay Duterte.
Ginalauman nga patigayunon sa adlaw nga Martes, Setyembre 23, ang oral arguments sang prosecution kag defense nahanungod sa 16-vote threshold para sa conviction.
Sa matandaan nga nangin mainit ang diskusyon sa voting threshold matapos magpangayo ang impeachment court sang opinyon halin sa mga anay mahistrado sang Supreme Court.
Nahibaluan nga tatlo sa apat ka legal experts nga gin-imbitar bilang amici curiae ang nagsiling nga posible nga mabag-o ang 16-vote threshold.
Samtang, may eksperto naman nga nagapati nga dapat magbase gihapon sa kabug-usan nga 24 ka miyembro sang Senado ang two-thirds requirement nga yara sa Konstitusyon.
Ang mangin desisyon sang impeachment court sa voting threshold amo ang magadeterminar kon pila ka boto ang kinahanglan para sa conviction ukon acquittal ni Duterte.
