ILOILO CITY – Pasado na sa Iloilo City Council ang gin-amyendaran nga ordinansa sang Committee on Public Transportation nga Memorandum Circular No. 2020-2240 ukon ‘Private Motor Vehicle Inspection Standards’ bilang kampanya kontra sa modified mufflers.
Sa interview sang Bombo Radyo kay Iloilo City Councilor Atty. Sedfrey Cabaluna, chairman sang nasambit nga komitiba, iya ginpahayag nga ginpanubuan na ang allowed decibels sa motorsiklo kag salakyan sang 99 decibels kun ipaangid sa 115 decibels.
Suno kay Cabaluna, mahimo na nga makapang-dakop ang mga kapulisan sang pasaway nga motorista, sa diin indi kinahanglan pa nga hulaton ang opisyal sang Public Safety and Transportation Management Office bangud kabahin na ang mga ini sang implementing bodies.
Ginpahayag dugang sang natungdan nga sa tion nga madakpan ang mga nagalapas sa layi, magabayad ang mga ini sang P1,000 kag confiscation sang muffler sa 1st offense; P3,000 sa second offense kag confiscation sang muffler; kag P5,000 sa third offense kag confiscation sang muffler.
Apang, ini ang indi lang limitado sa mga motorsiklo, kundi sa mga four-wheeler man nga mga salakyan.
