ILOILO CITY – Gin-flag sang Commission on Audit ang masobra P1 billion nga wala nagamit nga pondo para sa service contracting program sang gobyerno.
Sa 2022 audit report sang Department of Transportation, ginpahayag sang Commission on Audit nga P1.4 billion ukon 8.41% sang total fund allocation nga P16.97 billion para sa service contracting program ang wala nagamit.
Na-obserbaran sang state auditors nga P619 million ukon 3.99% sang total obligations nga P15.5 billion ang wala nabayaran sang service contracting program participants as of December 31, 2022.
Samtang, wala pa na-collect ang P21.8 million nga overpayment sa mga participants sang nagtakup ang tuig 2022.
Sa idalom sang service contracting program, ang mga operators kag drivers nga nagpasakup sa programa ang makabaton sang one-time payout kag weekly payments base sa kilometro nga ginbyahe sa tagsa ka semana, may pasahero man ukon wala.
Ang operators sang mga public utility vehicle ang ginakontrata pinaagi sa agreement base sa plano nga ginhanda sang Land Transportation Franchising and Regulatory Board.
Ang Republic Acts 11494 nga Bayanihan to Recover as One Act, 11518 ukon 2021 General Appropriations Act, kag 11639 ukon 2022 General Appropriations Act ang nag-allocate sang kabug-usan nga P16.97 billion para sa pagpatuman sang nasambit nga programa agud nga mahatagan sang monetary subsidies nga magaserbe bilang temporaryo nga palangitan-an sang mga nagtrabaho sa transport industry nga naga-recover nagikan sa epekto sang Coronavirus disease 2019 pandemic kag para sa padayon nga implementation sang programa.
Wala na-utilize sang Land Transportation Franchising and Regulatory Board ang kabug-usan nga service contracting program phase 1 funds apisar sang extension sang utilization tubtob sa June 30, 2021; gani, ang total cash in bank balance sang Agosto 5, 2021 nga nagdangat sa P4.007 billion ang wala nabalik sang ahensya sa Department of Transportation.
Gin-recommend sang state auditor sa ahensya nga i-facilitate ang gilayon nga pagbayad sang unpaid obligations sa program participants kag ang ila nagaka-igo nga liquidation sa Department of Transportation agud nga ma-determine ang exact amount sang wala nagamit nga pondo as of December 31, 2022.
Ginmandu man sang state auditors sa Department of Transportation ang gilayon nga pagbalik sang tanan nga wala nagamit nga pondo sa idalom sang tatlo ka mga layi nga refundable sa Bureau of the Treasury.
