ILOILO CITY- Wala pa makilal-an ang isa ka lalaki nga motorcycle rider nga nakuhaan sang video nga nagauyat sang baseball bat kag naglampos sa driver sang pick-up truck sa Diversion Road, Mandurriao, Iloilo City.
Natabo ang insidente samtang bumper to bumper ang sitwasyon sang trapiko sa lugar kag nakuhaan sang video ang ginhimo sang lalaki.
Makit-an sa video nga ginbuksan sang suspek ang pwertahan sang pick-up truck kag pila ka beses nga ginhanot sang baseball bat.
Sa interview sang Bombo Radyo kay Mr. Jeck Conlu, pinuno sang Public Safety Unit, iya ginpahayag nga ginatinguhaan nila nga makakuha sang iban nga footages sa area nga makabulig agud madasig nga matumod ang suspek.
Suno kay Conlu, ini ang makabig pinakabayolente nga road rage sa syudad.
Nahibaluan nga nag-angkon gid sang mga injuries ang biktima.
Pahayag ni Conlu, ginahibalo man sa biktima kun may yara pa sang natabo antes ang insidente kun ngaa amo nalang ang ginhimo sang suspek.
Sa pagpangusisa naman sang Bombo Radyo, ang salakyan ang ginapanag- iyahan sang Department of Public Works and Highways- Iloilo City District Office.
Ginapahayag nga ang target sang pagpang-atake amo si certain Sudario nga pinuno sang construction division apang sang amo nga tion, yara ini sa passenger seat nagapungko kag ang driver nga isa ka empleyado man amo ang natam-an.
Nagapungko man sa likod sang salakyan ang isa ka babaye nga empleyado man sang ahensya.
