Ginapanan-aw sang Bureau of Fisheries and Aquatic Resources (BFAR) nga maganubo ang presyo sang isda sa masunod nga sinemana kasunod sang pagtapos na sang closed fishing season sa tamudyos sa Northern Palawan.
Suno sa ahensya, maga-resulta ini sa pagdamo sang suplay sang amo nga isda sa local market.
Pahayag ni BFAR Chief Public information Officer Nazzer Briguera, kun madamo nga isda ang pilian sa merkado, magabuhin ang presyo.
Sa subong, sandig sa latest price monitoring sang Department of Agriculture (DA), ang tamudyos ang mahimo mabakal sang 200 to 320 pesos kada kilo, samtang ang imported round scad ang ginabaligya sa 180 tubtub 260 pesos.
Ginapanan-aw man nga kun magnubo ang presyo sang tamudyos, may domino effect man ini sa iban nga agricultural commodities kaangay sang karne.
Nagpahayag man ang BFAR nga indi lang ugaling insigida nga makalab-ot sa local market ini nga mga tamudyos apisar pa sang pag-lift na sang closed fishing season sa Northern Palawan. #
