Nangindulaan ang mensahe ni Vice President Sara Duterte para sa ika-38 nga anibersaryo sang EDSA People Power Revolution.
Ini nga mensahe nga gin-post sang nagligad nga Domingo, Pebrero 25, ang indi na makit-an sa anuman nga social media account sang bise presidente.
Sa amo nga post, matandaan nga ginduso ni Duterte sa mga Pilipino nga padayunon nga itib-ong ang espiritu sang EDSA kag manindugan gid kun ano ang husto.
“On this day, we commemorate the brave souls who stood united on the streets of Edsa, fighting for democracy and freedom,” kabahin sang post nga subong nakakas na. “As we celebrate this momentous occasion, let us remember the lessons of EDSA—the power of unity, the strength of the Filipino spirit, and the importance of standing up for what is right.”
Ginahulat pa ang sabat sang Office of the Vice President kaangot sa amo nga isyu.
Ang EDSA People Power Revolution nga ginakomemorar sa kada Pebrero 25 kada tuig amo ang pagdumdom sa maragtason nga adlaw sang 1986 sang napalayas sa pwesto ang anay diktador nga si former President Ferdinand Marcos Sr. matapos ang masobra 20 ka tuig sini nga pagginahum sa Malacañang.
Ang former president amo ang amay ni incumbent President Ferdinand “Bongbong” Marcos Jr. nga amo ang runningmate ni Sara sang 2022 elections.
Apisar sini, base sa mga tinalikdan nga hitabo sang nagligad nga mga binulan, nagaguwa sa istorya nga may lamat na sa relasyon sang team sang duha — halimbawa, sa word war sa tunga sang pamilya ni Sara kag ni Marcos.
Una naman nanindugan si Sara nga “okay” ang ila relasyon ni Marcos — sa personal man ukon sa trabaho.
Ang Department of Education — nga ang tiglikom amo man si VP Sara Duterte — ang una man nga nagpaguwa sang memorandum nga nagaduso sa public elementary kag high schools sa bilog nga pungsod nga magpatigayon man sang mga aktibidad agud dumdumon ang 1986 EDSA People Power Revolution.
