ILOILO CITY- Patay ang isa ka babaye sang gintiro sa sulod sang sari-sari store sa Barangay Sablogon, Passi City.
Ang biktima amo si Roselle Andrada, 40-anyos, isa ka LGBTQ+ community member, kag residente sang Barangay Man-it sang amo nga syudad.
Sa interview sang Bombo Radyo kay Cecille, tag-iya sang tindahan nga kaingod sang baligyaan sang biktima, iya ginpahayag nga may nabatian ini nga tatlo ka lupok sang armas-luthang nga ginsundan sang singgitan sang upod sang biktima sa sari-sari store.
Suno kay Cecille, wala pa sang isa ka tuig sang nag-umpisa sila sa pagbaligya sang mga ulotanon sa lugar.
Sandig naman sa panaysayon ni Alyas Boy, tricycle driver sa lugar, ginlaragway sini nga mabuot kag maayo nga klase sang abyan ang biktima.
Suno kay Boy, nagsulod pa ang suspek sa tindahan kag nagbakal apang sang mabayad na, didto kag ginluthang sang suspek ang babaye.
Dugang sang natungdan nga gilayon nagpalagyo ang suspek sakay sa iya motorsiklo.
Ginpahayag man sang natungdan nga may suksok nga bonnet kag grey nga jacket ang suspek.
Nag-agum naman sang patal nga pilas sa ulo ang biktima nga gintunaan sang iya kamatayon.
Padayon nga gina-imbestigaran sang otoridad ang insidente agud matul-id ang motibo sa pagpatay sa biktima.
