Ginhingadlan sang Malacañang si Police Lieutenant General Emmanuel Baloy Peralta bilang officer-in-charge (OIC) sang Philippine National Police (PNP) kasunod sang pagtakop na sang ginpalawig nga termino ni Police General Benjamin Acorda Jr.
Sandig sa memorandum halin kay Executive Secretary Lucas Bersamin, si Peralta ang magapamuno sa 232,000 nga myembro sang PNP umpisa Marso 31 tubtub nga may opisyal na nga iga-appoint nga amo ang magapungko bilang pinuno sang hanay sang kapulisan.
Disyembre sang nagligad nga tuig sang nalab-ot na ni Acorda ang compulsory nga edad sang retirement apang gin-extend ni President Ferdinand Marcos, Jr. ang iya termino tubtub Marso 31, 2024.
Antes ang iya designation bilang OIC sang PNP, si Peralta amo ang deputy chief of administration. Nangin director man ini anay sang Police Regional Office sa Ilocos nga amo ang home region sang presidente.
Ang katapusan nga tion nga may OIC sa PNP amo ang sa panahon sang Duterte administration sang ginhingadlan si anay Davao City police chief Vicente Danao bilang acting chief sang PNP inadlaw antes ang general elections sang Mayo 2022.#
