Nagpasalig ang National Economic and Development Authority (NEDA) nga “under control” pa gihapon ang nagatimbuok nga utang sang Pilipinas.
Suno ini kay NEDA Secretary Arsenio Balisacan matapos nga ginkumpirma sang Bureau of Treasury nga nagdangat na sa P15.18 trillion ang utang sang Pilipinas sa katapusan sang Pebrero 2024.
Sa sini nga utang, 69.68% ang domestic debt samtang 30.32% naman ang hinulaman nga balor halin sa luwas sang pungsod.
Kasunod sini nga announcement, gin-anunsyo man sang gobyerno ang revised target nga gross domestic product (GDP) nga yara sa 6 to 7 percent nga sang una yara sa 6.5 tubtub 7.5 percent.
Paathag pa ni Balisacan, ang revision sang ila nga target ang wala sang labot sa record-high nga utang sang Pilipinas. Ginhimo nila ini suno sa tiglikom agud mangin “realistic” kag “sustainable” ang target.
“We are actually very… in a very good position. The rule of thumb for emerging economies is 70% of GDP… that is threshold ‘no. We are moving from 60% which way below 60 to even lower ‘no of 55 – almost about 56% by the time we end the term of the current President,” paathag ni Balisacan sang iya ginsiling nga “under control” pa ang kautangan sang nasyon.
Nahibaluan nga plano pa sang Marcos administration nga maghulam sang P2.46 trillion halin sa mga manugpautang (domestic kag abroad) subong nga 2024 agud nga malab-ot ang budget deficit nga ginalantaw magatupa sa P1.4 trillion subong nga tuig.#
