Aprubado na sang mga mamalidha sa US House of Representatives ang $95 billion ukon P5.47-trillion nga ayuda sa mga kaalyado sang Estados Unidos sang Amerika nga Israel, Ukraine, kag Taiwan.
Apat ka hagna ang natingob sa package kag separado nga ginbotohan apang tingbon lamang sa isa antes ini ipadala sa Senado.
Lakip diri ang $60.8 billion (P3.5-trillion) agud buligan ang Ukraine sa pagpang-atake sang Russia; $26.4 billion (P1.5-trillion) nga suporta sa Israel nga nagatimalos sa Hamas militants kag subong nabutang man sa mataas nga tensyon kontra sa Iran; kag ang $8.1 billion (P466.3-billion) agud nga balabagan ang mga agresibo nga tikang sang China sa Indo-Pacific.
Nalakip man diri ang humanitarian aid para sa mga sibilyan sa Gaza sa Palestine nga amo ang nagasuprer bangud sa binulan nga gyera sa tunga sang militar sang Israel kag Hamas militants.
Ang ikaapat nga hagna amo ang magapahanugot sang pagbaligya sang frozen assets sang Russian oligarchs agud nga gamiton bilang ayudad sa Ukraine; posible nga pagbaligya sang TikTok; kag ang pag-authorize sang mas mapag-on nga sanctions batok sa Russia, China kag Iran.
Aprubado sang House ini nga ikaapat nga hagna nga may 360 to 58 vote.
Ginseparar ni House Speaker Mike Johnson ang pagpaboto sa kada hagna agud tugutan ang kada myembro sang House nga magboto sandig sa ila konsensya sa kada kaalyado nga pungsod nga ila buligan.
Nagpasalamat naman si US President Joe Biden sa tikang sang mga mamalidha kag gintawag ini nga maathag nga mensahe kun ano kadaku ang gahum sang liderato sang Amerika sa world stage.
Ginalauman nga ipasar man sang Senado ang legislation sa Martes kag ipadala kay Biden para sa pirma agud dalayon nga mahimo nga layi.
Matandaan nga nagpadala si Biden sang supplemental spending request sa Kongreso nga nagahingyo sang amo nga ayuda anum ka bulan na ang nagligad.#
(Photo by Jennifer Shutt/States Newsroom)
