Gina-insister sang TikTok ang kinamatarong sa free speech matapos nga nagpasar sang bag-o nga hagna ang House of Representatives nga posible mag-ban sa amo nga application sa bilog nga Estados Unidos sang Amerika.
Ang bersyon sang hagna nga gin-aprubahan sang Sabado ang magahatag sa TikTok sang 270 ka adlaw agud nga makapangita sang bag-o nga tag-iya.
Apisar nga may kaangay man nga hagna nga ginpasar ang House sang Marso, may kinalain ang bag-o nga hagna bangud — una, ginlakip ini sa hagna nga magahatag sang ayuda agud masuportahan ang Ukraine kag Israel; kag ikaduha, gin-extend sini ang deadline para makapangita ang TikTok sang bag-o nga tag-iya bilang pagsabat sa concern sang pila ka myembro sang Senado.
Sa amo nga hagna, ginhatagan man sang option si US President Joe Biden nga palawigon ang deadline sang 90 ka adlaw kun matumod sang presidente nga may paghulag man sa pagbaligya sang application.
Sa buwas, posible nga pagabotohan na sang Senado ang amo nga hagna, kag sa bahin ni Biden, una na ini nagsiling nga pirmahan sini ang amo nga legislation.
Kun mapirmahan ini, ini ang labing-una nga tion nga nagpasar ang US government sang layi nga maga-shutdown sang bilog nga social media platform, apang posible man nga kontrahon sang iban paagi sa korte ilabi na bangud 170-million ka Americans nga nagagamit sini nga app.
Nahibaluan nga ang Biden administration kag ang madamo nga mamalidha halin sa Republican kag Democratic parties ang nagapati nga may dala nga pamahog ang TikTok sa national security sang pungsod bangud sa parent company sini nga ByteDance nga naka-base sa China.
Ginakahangaw-an nga manduan sang China ang kumpaniya nga maghatag sang data kaangot sa minilyon ka mga Amerikano nga nagagamit sa app.
Una na nga nagsiling ang TikTok nga wala sini gina-share ang US data kag wala ini sang plano nga ipanghatag ini sa iban.
Apang madamo ang nagapanindugan lakip ang Democratic US Senator nga si Mark Warner, chairman sang Senate Intelligence Committee, nga ang TikTok ang posible nga ginagamit sang Chinese government nga propaganda tool.#
