Isa ka daog na lang ang kinahanglan bulsahon sang Boston Celtics antes ini dalayon makatapak sa 2024 National Basketball Association (NBA) Finals.
Sa Game 3 sang Eastern Conference Finals, nagbangon ang team gikan sa 18-puntos nga second-half deficit kag ginlutos liwat ang host nga Indiana Pacers, 114-111.
3-0 na subong ang lead sang Boston sa best-of-seven series matapos wala man ginpaporma ang Pacers sa nauna nga duha ka hampang sa ila homecourt.
Nagpanguna si Jayson Tatum nga may 36 points, 10 rebounds kag walo ka assists samtang nangin late-game hero naman si Jrue Holiday sang ang three-point play sini 39 segundos ang nabilin sa hampang ang nagbutang sa Boston sa 112-111 nga lead batok sa Indiana. Ini ang nangin una nga lead sang Celtics sa opening possession sang second quarter.
Nagtapos si Holiday nga may 14 puntos samtang may 24 puntos si Jaylen Brown.
Balantayan buwas, 8:00 sa aga, kun ma-sweep sang Celtics ang Pacers kag makuha ang Eastern Conference title.
Wala nakabulig sa Game 3 sang Pacers ang All-NBA point guard nga si Tyrese Haliburton bangud sa injury sini sa left hamstring kag kwestyonable pa kun makahampang ini sa Game 4.
Pananglitan magdaog ang Boston, atubangon sini sa finals ang mangin winner sa tunga sang Dallas Mavericks kag Minnesota Timberwolves nga amo ang nagasambuwa sa Western Conference finals. Gina-uyatan nanday Luka Doncic ang lead sa serye, 2-0.
