ILOILO CITY- Liwat nga nahatagan sang kahigayunan ang Ilongga nga international fashion designer nga mangin kabahin sang Cannes Film Festival 2024 sa France.
Suno kay Bombo Chona Bacacao nga isa man ka Bombo international correspondent nga na-base sa Italya, dako nga dungog para sa iya nga makahilera niya ang iban nga dalagko nga mga pangalan sa nanuhay-tuhay nga industriya ilabi na sa fashion kag pelikula sa red carpet events.
Suno kay Bacaoco, sa amo nga kahiwatan, indi lang fashion designer ang gintungdan niya nga papel kundi troubleshooter sa mga events nga may nagaluntad nga problema.
Pahayag ni Bacaoco, ikatatlo na niya ini nga bes nga nagtambong sa festival, kag mabatyagan niya sa gihapon ang pressure sa paghatag sang pinakamanami niya nga serbisyo sa iya mga kliyente.
Ginkalipay naman sang Ilongga fashion designer nga madamo sa gihapon ang nagasalig sa iya, Pinoy man ukon indi, halimbawa na diri sanday 2015 Miss Universe Pia Wurtzbach kag kilala nga Pinoy fashion designer nga si Michael Cinco.
Ang Cannes Film festival isa sa pinakaprestihiyoso nga international film festival sa kalibutan.
