Patay ang 49 ka mga tawo matapos nasunog ang isa ka building sa Kuwait kun sa diin naga-istar ang ginabanta 200 ka foreign workers.
Wala pa sang ginpaguwa nga kumpirmasyon ang Department of Migrant Workers apang sa inisyal nga reports nga nagaguwa halin sa Kuwait, lakip sa mga biktima ang mga residente sang India, Pilipinas, Pakistan, Egypt, kag Nepal.
Suno sa health ministry, kaagahon sang natabo ang sunog sa anum ka panalgan nga building nga nahamtang sa nabagatnan sang Kuwait City.
Una nga nagpahibalo ang interior ministry nga 35 ang patay apang gin-revise kag ginpasaka sa 49 matapos nga nasulod na sang forensic teams ang building.
Nagpaandam man ang otoridad nga posible pa madugangan ang casualties bangud may mga kritikal pa subong ang kondisyon sa ospital.
Nahibaluan nga ang Kuwait ang masami destinasyon sang foreign workers halin sa South kag Southeast Asia kun sa diin kalabanan ang employed sa construction kag service industries.
