Balantayan 8:30 subong nga aga oras sa Pilipinas ang Game 4 sa tunga sang Boston Celtics kag Dallas Mavericks sa 2024 NBA (National Basketball Association) finals.
3-0 subong ang serye pabor sa Celtics, kag pananglitan malutos pa sini liwat ang Mavs sa ila mismo homecourt sa American Airlines Center sa Dallas, indi lamang sweep ang mahimo sang Boston kundi magapangibabaw man ini sa may pinakadamo nga kampyonato sa bug-os nga maragtas sang NBA.
Kun mabulsa nila ang kadalag-an, ini na ang ila ika-18 nga NBA title nga labaw na sang isa sa Los Angeles Lakers nga may yara subong sang 17 ka championships sa ila franchise.
Daku ini nga pagpanghangkat sa Mavs ilabi na bangud wala pa sang bisan isa ka team sa best-of-seven series sa NBA nga nakabangon sa 3-0 deficit, kag mas ginpabakod pa ini sang record sang Boston nga may 10-game winning streak kag perfect 7-0 road record sa postseason.
Apisar sini, ginsiling sang Celtics superstar nga si Jayson Tatum — nga matunog man ang pangalan nga mangin Finals MVP —nga wala pa sila naga-selebrar bangud madamo pa ang ila kinahanglan obrahon.
Posible man nga wala gihapon subong nga Game 4 ang Boston Big Man nga si Kristaps Porzingis bangud nalista ini nga kwestyonable sa injury report. Apang sa Game 3, bisan wala si Porzingis, nasarangan sang Boston nga masagang ang late scoring sang Dallas sa fourth quarter kag nakuha pa ang 106-99 nga kadalag-an.
Sa pihak nga bahin, apisar napaguwa sa hampang masobra kuwatro minutos ang nabilin sa fourth quarter, nagapati si Mavs superstar Luka Doncic nga indi pa tapos ang sambuwa.
Plano man sang Slovenian star nga mag-enjoy sa Game 4 apisar sang pressure: “Go back to playing fun. We talk about how we come back from [21] points in the fourth quarter in the Finals. We were having fun. We were defending. We were running. Our pace was great. Just taking good shots.”
Siya kag si Kyrie Irving ang nakatipon sang 62 points sa Game 3, apang ang siyam ka iban pa nga players sang Dallas ang nakapaulan lamang sang 37 puntos bangud man sa depensa sang Celtics.
