Ginrekomendar ni Senate Majority Floor Leader Francis Tolentino ang pagtipon sang National Security Council (NSC) agud nga makahatag sang mas maayo nga advise kay President Ferdinand Marcos, Jr. kaangot sa isyu sa West Philippine Sea (WPS).
Ang NSC amo ang “principal advisory body” para sa proper coordination kag integration sang mga plano kag polisa nga nagaapekto sa national security.
Ang chairman diri amo ang presidente kag nalakip man ang mga myembro sang Gabinete, Kongreso, kag iban pa nga opisyal sang gobyerno kag pribado nga mga indibidwal nga imbitado sang presidente.
Pahayag pa ni Tolentino, mahimo man ipahigad anay ang mga isyu sa pulitika kag imbitaron man ang nagligad nga mga presidente sa sini nga briefing sang NSC.
Ini nga suhestyon ni Tolentino ang kasunod sang Hunyo 17 nga atake sang China sa mga Pinoy nga soldado kadungan sang resupply mission sa Ayungin Shoal.
Magluwas nga walo ka mga soldado sang Pilipinas ang nasamaran, ginhanaan pa sila sang mga patalom, ginpangkuha sang China Coast Guard ang ila dala nga rifles nga dal-on kuntani sa BRP Sierra Madre, ginpangbuslutan ang ila nga inflatable boat, kag ginpangguba pa ang pila sa mga equipment — hulag nga ginlaragway sang Armed Forces of the Philippines nga isa na akwasyon sang mga pirata.
