Ginkilala kag gindayaw ni President Ferdinand Marcos Jr. ang mga soldado nga Pinoy nga nangin maisog sang ginbanggaan kag gin-harass sang China Coast Guard (CCG) ang rotation and reprovisioning (RORE) mission sang Pilipinas sa BRP Sierra Madre sa Ayungin Shoal sang Hunyo 17.
Sa iya pagbisita sa headquarters sang Western Command sa Camp General Artemio Ricarte, Puerto Princesa City, Palawan kahapon, Hunyo 23, ginpatigayon ni Marcos ang conferment sang Order of Lapu-Lapu Rank of Kampilan kay Seaman First Class Underwater Operator Jeffrey Facundo, ang Navy personnel nga na-utdan gid sang tudlo bangud sa aktwasyon sang China.
“Let me, of course, mention Seaman First Class Underwater Operator Jeffrey Facundo, who was harmed and injured in the recent incident,” kabahin sang speech ni Marcos sang ginmensyonar sini si Facundo. “As we award these medals, we remember that on June 17th, we made a conscious and deliberate choice to remain in the path of peace.”
Pahayag pa sang chief executive: “So, in a simple gesture of gratitude, I will be joined by the Secretary of National Defense to award the Order of Lapu-Lapu in recognition of your recent actions in the recent reprovisioning efforts.”
Ang Order of Lapu-Lapu amo ang ginahatag sa government officials kag personnel amo man sa pribado nga mga indibidwal bangud sa ila “invaluable or extraordinary service in furtherance of the President’s campaign or advocacy,” suno sa Presidential Communications Office (PCO).
Ginhatag man ang Order of Lapu-Lapu Rank of Kamagi sa 79 ka iban pa nga mga soldado nga nangin kabahin man sang amo nga delikado nga misyon.
Ang natabo sang Hunyo 17 suno kay Marcos ang pamatuod nga ang gusto sang Pilipinas amo nga magpabilin sa pag-usoy sa banas nga malinong kag indi banas nga magaresulta sa gyera.
Sang amo nga adlaw, ginbanggaan sang CCG ang tropa sang militar sang Pilipinas samtang may mga dala nga wasay, binangon, kutsilyo, kag mga stick. Magluwas nga gin-hanaan ang mga Pinoy, ginguba man pati ang navigational screen kag iban nga equipment sa Philippine vessels, ginbuslutan ang rubber boat, kag ginkawat pa ang rifles nga i-suplay kuntani sa BRP Sierra Madre.
Ang Ayungin Shoal ukon ang Second Thomas Shoal ang ginatawag man sang China nga Ren’ai Reef. Nahamtang ini 105 nautical miles sa nakatundan ang Palawan kag sulod sa 200-mile exclusive economic zone (EEZ) sang Pilipinas kag parte pa sang continental shelf sang pungsod.
