Aprubado na ni Pope Francis kag sang grupo sang cardinals ang kanonisasyon sang 15-anyos nga solterito sa Italya nga si Carlo Acutis apang wala sang ginhatag nga eksakto nga petsa kun san-o ini mabutang sa lista sang Catholic saints.
Suno sa Vatican, mahimo maproklamar si Blessed Carlo Acutis bilang Santo kadungan sang 2025 Jubilee nga posible idungan sa iban man nga canonizations.
Ang Jubilee amo ang isa ka Holy Year nga tradisyonal nga nagakatabo sang isa ka bes lamang sa sulod sang 25 ka tuig.
Ginalauman nga sa sini nga tion, 30 million ka tumuluo ang magakadto sa Roma agud nga magpangayo sang kapatawaran sa ila nga mga sala.
Pananglitan matabo ang canonization kay Acutis sa sini nga 2025 Holy Year, makabig ini nga bag-o nga nawong sa Simbahang Katolika.
Isa siya ka computer programmer nga napatay bangud sa leukemia sang Oktubre 12, 2006 kag ginbansagan na sang iban nga “the first millennial saint”.
Masami siya nagasuksok sang jeans kag trainers kag nagahampang sang video games kaangay sang Halo, Super Mario kag Pokémon, kag iban pa nga aktibididad nga gina-enjoy sang sini nga henerasyon. Ang iya istorya ang ginapanan-aw nga makabulig sang daku sa Catholic Church agud nga mas makapalapit sa mga kabataan sa digital age bangud sa pagka-popular man sini sa Catholic youth groups.
Nahibaluan nga bisan malip-ot lang ang kabuhi sini, naka-set up ini sang website nga naga-dokomento sang reports sang mga milagro sa nagkalin-lain nga bahin sang kalibutan.
Ang approval nga ginhatag ni Pope Francis kag sang College of Cardinals sang sini lang nga Hulyo 1 ang makabig nga “formality”, bangud sang Mayo 23, matandaan nga ginkumpirma na sang Vatican ang ikaduha nga Milagro nga naangot sa intercession sang solterito nga isa ka prerequisite para sa pagka-santo.
Sa consistory sang Lunes, gin-aprubahan man ang canonization sang 14 ka iban pa nga candidates sa sainthood. 11 sa ila suno sa Vatican ang napatay sa 1860 Syrian Civil War,” kag gintawag nga “Martyrs of Damascus.” Ini nga 14 candidates ang natalana nga i-canonize sa October 20.
