Dako ang posibilidad nga gamiton ni former United States President Donald Trump bilang advantage sa iya plano nga pagpadalagan sa November 5, 2024 presidential elections ang pinakaulihi nga desisyon ang Korte Suprema sang Estados Unidos.
Sa nasambit nga desisyon, nagwa nga may immunity si Trump sa criminal prosecution para sa pila ka akto nga ginhimo sini sang siya pa ang presidente sang Amerika.
Sa interview sang Bombo Radyo kay Atty. Joenar Pueblo, political law professor sa University of San Agustin College of Law, iya ginpahayag nga dako ang epekto kay Trump ang desisyon sang Korte Suprema ilabi na nga statistical tie sila sa subong ni United States President Joe Biden.
Ang 78 anyos nga si Trump amo ang presumptive Republican presidential nominee nga mabunggo sa 81 anyos nga si Biden sa 2024 presidential elections sa Nobyembre.
Suno kay Pueblo, duha ka issue sa subong ang ginatutukan sang kampo ni Trump.
Ini amo ang ginapahayag pagmanipula sa 2020 United States elections kag pag-atake sang mga supporters sini sa United States Capitol Building sa Washington, D.C.
Sa tion nga mapamatud-an ni Trump nga may immunity sa nasambit nga mga gina-akusar sa iya, pat-od suno sa abogado nga makaapekto ini sang dako sa ila pagsambuwa ni Biden.
