ILOILO CITY- Ka- Bombo, ano ayhan ang mangin reaksyon mo kun isa ka adlaw, natukiban mo nga kasal ikaw sa tawo nga wala mo man lang nakilala sa bilog mo nga kabuhi?
Pat-ud nga makibot ka.
Ini ang natabo sa 24-anyos nga babaye sa Russia nga naeksperyensiyahan ang pinakamakakilibot nga hitabo sa iya kabuhi matapos natukiban nga kasado siya sa iya ka Egyptian citizen humalin pa sang 2022, isa ka tuig matapos nadula ang iya nga passport.
Ang wala ginhingadlan nga babaye sa St. Petersburg ang nagsiling nga nadula ang iya passport sang 2021, apang apisar gindeklarar niya nga nadula ini, wala na siya nagtuyo pa nga magkuha sang bag-o nga passport..
Wala man ini nagdumdom nga ang nadula niya nga passport ang panginpuslan sang iban nga tawo.
Kag sang damlag lang, samtang nagaproseso ini sang birth certificate para sa iya bata, nakibot siya nga gin-request nga dapat ara man ang presensya sang iya bana nga isa ka Egyptian nga amo si Mustafa.
Wala gid niya makilala ini si Mustafa gani imposible man nga nakasal sila apang sa Russian registry, ginlista si Mustafa nga bana niya.
Indi pa maathag kun si Mustafa ang nakakita sang nadula nga passport ukon kun ginbakal niya ini sa black market, apang naggwa nga gin-gamit sang Egyptian national ang dokumento sa pag- apply para sa temporary residence permit sa Russia, kag ginsiling nga bana siya sang babaye.
Ang dokumento nagaunod sang sulat tuhoy sa ila kasal nga nasaad nga natabo sang Enero 2022.
Matapos nabatian naman ang testimonya sang babaye kag nakumpirma nga gindeklarar niya ang iya passport nga nadula kag indi niya kilala ang amo nga Egyptian husband, gin-annul man sang Russian court ang amo nga kasal.annulled the marriage.
Nagapabilin naman nga palaligban kun paano nakaparehistro sang kasal ang lalaki sa isa ka Russian national gamit lamang ang passport.
