Gin-anunsyo ni Health Secretary Ted Herbosa nga posible nga aprubahan na sang Philippine Food and Drug Administration (FDA) subong nga tuig ang lisensya ang second-generation dengue vaccine.
Ginatumod sang tiglikom ang QDENGA vaccine sang Takeda Pharmaceuticals sang Japan nga naka-apply na para sa certificate of product registration (CPR) sa FDA sang 2023.
Sang nagligad nga bulan, matandaan nga nagpanawagan ang mga grupo sang mga doctor nga aprubahan na sang FDA ang lisensya para sa amo nga bakuna bangud naulihi na ang Pilipinas sa kaiping nga mga nasyon kun pagahambalan ang pagbakuna batok sa amo nga viral infection.
Suno naman kay Herbosa, naka-istorya na siya sa Takeda Pharmaceuticals kag ginahulat na lang ang pagtuon sang FDA kaangot sa approval sang bag-o nga vaccine.
Matandaan nga sang 2015, nangin labing-una ang Pilipinas sa Asya nga nag-approve sang pagbaligya sang first-ever dengue vaccine sa kalibutan nga amo ang Dengvaxia.
Nangin kontrobersyal ini sang 2017 matapos gin-anunsyo sang manufacturer nga Sanofi Pasteur nga ang Dengvaxia ang mahimo mag-resulta sa severe symptoms” para sa mga wala man na-infect sang dengue antes ang vaccination.
Bilang resulta, ginmandu sang FDA ang suspension sa pagbaligya, distribution, kag marketing sang amo nga vaccine amo man ang pagbawi sang amo nga produkto sa market.
Antes mag-abot ang second-generation dengue vaccine sa Pilipinas, ginsiling ni Herbosa nga ang vector control amo gihapon ang main solution sa pagdamo sang kaso sang dengue subong nga tig-ululan.
Base sa data sang DOH, halin sang Enero tubtub sang Hunyo 15, yara na sa 77,867 dengue cases ang na-rekord sa Pilipinas kun sa diin 205 ang nagkalamatay.
