Hiwaton na subong nga Domingo, Hulyo 7, ang coronation para sa Binibining Pilipinas 2024 kun sa diin nagahulat ang tag-P1-million nga padya para sa mapilian nga tagdaog — pinakadaku nga prize money nga ihatag sa sulod sang 60-anyos nga maragtas sang prestihiyoso nga national pageant.
Kaangay sa kumpetisyon sa nagligad nga tuig, duha ka winners ang iproklamar kag magabaton sang titulo nga Bb. Pilipinas International kag Bb. Pilipinas Globe.
Magluwas nga pareho nga makabaton sang P1-million prize, pareho man sila nga magasuksok sang bag-o nga korona nga gin-design sang renowned jewelry kag accessories maker nga si Manny Halasan.
Gin-anunsyo man sang organisasyon nga magadonar ang Bb. Pilipinas Charities Inc. (BPCI) sang P1-million sa napilian sini nga charity institution subong nga tuig nga amo ang World Vision Philippines.
Magaserbe nga hosts sa koronasyon amo sanday Miss Universe 2018 Catriona Gray, Miss International 2016 Kylie Verzosa, Miss Grand International 2016 first runner-up Nicole Cordoves, Miss Universe Philippines 2014 MJ Lastimosa, kag 1993 Miss World princess Ruffa Gutierrez.
40 ka mga kandidata ang maga-compete para magbulos sa korona nanday Bb. Pilipinas International Angelica Lopez kag Bb. Pilipinas Globe Anna Valencia Lakirini.
Balantayan man ang all-male squad sang musical acts Martin Nievera, Gary Valenciano, TJ Monterde, Maki kag ang phenomenal P-Pop group nga SB19.
Nahibaluan nga lakip sa na-produce sang Binibining Pilipinas amo ang apat ka Miss Universe winners sang Pilipinas nga sanday Gloria Diaz, Margie Moran, Pia Wurtzbach, kag Gray. May yara man sang lima ka Miss International winners Aurora Pijuan, Melanie, Marquez, Precious Lara Quigaman, Bea Rose Santiago, kag si Verzosa.
Gikan man sa Bb. Pilipinas sanday Miss Intercontinental winners Karen Gallman kag Cinderella Faye Obe ita amo man sanday Maricar Balagtas, Ann Colis kag Maureen Montagne nga pareho ginkoronahan sa Miss Globe pageant system.
