𝗠𝗔𝗡𝗜𝗟𝗔 — Ginaplano ni former Senator Antonio Trillanes IV nga magpasaka sang dugang nga mga reklamo batok kanday former President Rodrigo Duterte kag Senador Christopher “Bong” Go.
Sa interview sang Bombo Radyo kay Atty. Joenar Pueblo, political law professor sa University of San Agustin, iya ginpahayag nga nakasaad sa bag-o nga mga reklamo nga gintumod ni Trillanes ang kasugtanan sang frigate deal sang Philippine Navy.
Suno kay Pueblo, maga-file ang kampo ni Trillanes sang mga kaso may kaangtanan sa frigate scam, apang kinahanglan nga magtipon anay sang mga dokumento agud mangin mas mabaskog ang kaso batok kay Duterte kag Go.
Matandaan man nga sang 2019, ginpahayag ni Trillanes nga gin-ako ni Duterte ang krimen nga plunder sang ginkumpirmar sang anay chief executive nga nagpasilabot sila ni Go sa frigate deal.
Suno naman kay Duterte, gin-aktuhan lamang niya ang reklamo sang South Korean supplier kag ginpasa ini kay Go nga amo ang iya ginasaligan nga kabulig sa amo nga tion.
Nahibaluan nga sang nagligad nga Hulyo 5, nagpasaka sang plunder complaint si Trillanes batok kay Duterte kag Go sa Department of Justice.
Gin-akusahan man sanday Duterte kag Go nga naglapas sa The Anti-Graft and Corrupt Practices Act kag The Code of Conduct and Ethical Standards for Public Officials and Employees.
