Opisyal na nga ginpaguwa sang Philippine National Police (PNP) ang wanted posters para sa pugante nga self-proclaimed Appointed Son of God nga si Pastor Apollo Quiboloy kag ang lima pa sini ka kaupdanan.
Sa poster nga ginpaguwa sang otoridad, nakasaad nga wanted si Quiboloy bangud sa “human trafficking, child abuse, kag contempt of court.”
May P10-million nga reward nga ihatag sa sin-o man nga makahatag sang impormasyon kaangot sa iya nahamtangan.
Sa pihak nga bahin, P1-million naman ang reward sa makahatag impormasyon sa nahamtangan sang iban pa nga akusado nga amo sanday Jackielyn Roy, Cresente Canada, Paulene Canada, Ingrid Canada, kag Sylvia Cemañes.
Antes sini, si Interior Secretary Benjamin Abalos Jr. ang nag-anunsyo sang daku nga padya.
“We have friends who want to help find them and have offered a reward of P10 million for any information leading to the arrest of Pastor Quiboloy and P1 million each for others,” suno sa tiglikom sa isa ka press conference sa Camp Crame, Hulyo 9. “These friends are people already frustrated about what’s happening. I mean, look at the crimes. There’s child abuse and exploitation, children. There’s also a trafficking case with no bail.”
Nagpanawagan man ang tiglikom sa nasambit nga Kingdom of Jesus Christ (KOJC) leader kag founder nga magsungka kun wala man ini sang ginatago nga sala.
“If you are innocent, pastor, face the court, surrender, and finish this. Face the accusation like any other ordinary person does,” dugang sang DLG chief.
Ginkumpirma naman ni PNP Chief Gen. Rommel Francisco Marbil nga mahimo man mapasakaan sang reklamo si anay Presidente Rodrigo Duterte bangud sa pagtago sini sang lokasyon kun sa diin ang iya abyan nga si Quiboloy.
Suno kay Marbil, mahimo nga obstruction for justice ang atubangon sang anay presidente nga amo man ang administrador sang mga propyedad sang KOJC.
Matandaan nga sang nagligad nga semana, ginsiling ni Duterte sa isa ka press conference nga nakahibalo siya kun sa diin si Quiboloy apang “secret” lang.
Nagapangatubang si Quiboloy sang sexual abuse and trafficking cases sa Davao City kag Pasig City courts bangud sa reklamo nga ginpasaka sang mga anay myembro sang KOJC apang nagapanindugan ang pastor nga ginhimo-himo lang ini sang mga anay myembro nga may dumot sa amo nga religious group.
