ILOILO CITY-Ginkadlawan ni Iloilo City Councilor Rex Sarabia ang sabat sang Metro Iloilo Water District sa sulat sang council nga nagapangayo sang kopya sang pila ka mga dokumento.
Una na nangayo ang city council sang mga dokumento nga ginalakipan sang Joint Venture Agreement sang Metro Iloilo Water District kag Metro Pacific Iloilo Water, Five-Year and Ten-Year Action Plans, Completion of Projects of Advocacy, kag Complete Set of Annexes sa Joint Venture Agreement.
Sa interview sang Bombo Radyo kay Atty. Sarabia, iya ginpahayag nga naham-ot siya kag natingala sa sabat sang Metro Iloilo Water District nga kinahanglan pa sini sang written consent sang joint venture partners.
Suno kay Sarabia, ginrason man sang Metro Iloilo Water District nga kinahanglan pa nila ang opinyon sang ila legal counsel.
Ginpahayag sang konsehal nga sa pagkamatuod, ginpadal-an man sang kopya sang konseho sang resolution ang Metro Pacific Iloilo Water tuhoy sa mga dokumento nga ila ginapangayo.
Dugang pa sang konsehal, makabig nga public documents ang ila ginapangayo bangud nga government-owned and controlled ang Metro Iloilo Water District gani responsibilidad sang amo nga sater distribution utility nga i-provide ini sa konseho.
Kasunod sini, ginhatagan sang konseho sang 10 ka adlaw ang Metro Iloilo Water District kag Metro Pacific Iloilo Water agud mapasa ang mga dokumento lakip na ang Joint Venture Agreement.
Nahibaluan nga ang tikang sang konseho ang may kaangtanan sa ginahingyo sang Metro Pacific Iloilo Water nga himuon nga P29 per cubic meter ang ila nga water rate.
Kun mapaslawan nga makapasa sang mga dokumento, iapelar sang konseho sa National Water Resources Board nga indi pagtugutan ang request sang Metro Pacific Iloilo Water nga magpasaka sang presyo sang ila tubig.
