Indi lang isa, indi lang duha… kundi tatlo gid ka mga pulis ang nag-uyat sang posisyon bilang pinuno sang Davao City Police Office (DCPO) sa sulod lamang sang isa ka adlaw.
Ini nga tumalagsahon nga sitwasyon ang natabo kahapon, Hulyo 10.
Una, gin-report nga nagpungko na sa posisyon si Davao City Police Office Director Colonel Lito Patay apang wala nagdugay bangud eksakto 4 ka oras kag 38 minutos lamang siya sa pwesto.
Ginpahayag nga ‘las otso sa aga sang nag-assume ini sa opisina, apang nagtawag ang Camp Crame sang 12:38 sang udto nga amo ang nag-relieve kay Patay sa posisyon bilang city police director nga isa sa pinakamalip-ot nga termino sa maragtas sang amo nga syudad.
Ginpahayag nga yara sa tunga-tunga sang command conference si Patay kaupod sa 19 ka newly-assigned nga Davao City Police Office officers sang nabaton ang tawag. Bangud sang tawag, gin-reshuffle ang liderato sa Philippine National Police (PNP) sa Region XI.
Base sa inisyal nga reports, ang ginbulos kay Patay amo si Col. Sherwin Butil, former head sang PRO XI Information and Communications Technology Management Division.
Apang sang manugpungko na ini sang hapon, ginpahibalo ini nga gin-appoint man si Col. Hansel Marantan bilang bag-o nga acting DCPO director.
Sunod nga ginkumpirma ni Marantan nga nakabaton siya matuod sang order halin sa national headquarters sang Philippine National Police (PNP) sang hapon agud nga magdiretso ini sa Davao kag magpungko bilang head sa “acting” capacity.
Indi pa subong maathag kun ano ang rason sang natabo kag ano ang rason sang madasig nga pagbayluhanay sang posisyon.
Si Patay ang ginapahayag nga myembro anay sang “Davao Boys,” ang grupo sang mga pulis sa Davao City nga gindala sa Metro Manila agud makigbahin sa implementasyon sang drug war ni anay Presidente Rodrigo Duterte.
Isa man sa ginaangot nga possible rason sa pag-relieve sa iya amo ang statement ni International Criminal Court (ICC) Assistant Counsel Kristina Conti bangud ginsaad sini nga isa si Patay sa implementers sang drug war apang gin-appoint pa bilang police chief sa Davao.
Nagpaguwa man sang statement si Davao City Mayor Sebastian Duterte nga nagapakamalaot sa mass relief sang 19 station commanders sang DCPO kasunod sang mandu ni PNP chief Gen. Rommel Francisco Marbil.
“If General Torre thought that Davao City police personnel were ineffective in their duties, then how come the very institution he leads has consistently recognized the Davao City Police Office as the top performing police office in the region?,” kabahin sang pahayag sang anak nga Duterte.
Una na nga ginpahayag ni PRO director Brig. Gen. Nicolas Torre nga ginmandu ang mass relief bangud sa ila pigado nga performance sa pag-solbar sa mga krimen.#
