Magapatindog sang police assistance desks sa mga entrance sang 19 ka patyo sa syudad sang Iloilo.
Ini agud mangin basehan sang mga kapulisan sa pagmonitor sang pagsulod kag paggwa sang mga pumuluyo sa mga patyo sa palaabuton nga Pista Minatay.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga sa Oktubre 30 magaumpisa ang skeletal deployment sang kapulisan, samtang sa Oktubre 31 naman ang full-scale deployment.
Ginalauman nga magapadayon ang pagbantay tubtob Nobyembre 2, apang mahimo pa ini nga i-extend depende sa kadamuon sang mga tawo nga magapadayon sa pagbisita sa mga patyo.
Suno pa kay Sangrines, magapatigayon man sang mobile patrol ang mga kapulisan agud mamonitor ang sitwasyon sa sulod kag guwa sang mga patyo.
Magabulig man sa seguridad ang mga barangay officials, mga tanod kag nagkalain-lain nga volunteer groups nga magaupod sa mga police assistance desk.
Ginapanawagan man sang kapulisan ang kooperasyon kag paghangop sang publiko sa mga security measures nga ipatuman.
Samtang, ginapabaskog man sang ICPO ang kampanya para sa smoke-free nga pagsaulog sang Pista Minatay bangud sa posible nga peligro sang sunog.
Dugang pa ni Sangrines, mas maayo nga indi na magdala sang sigarilyo kag vape ang mga magabisita, bangud indi man ini pagpasudlon sang kapulisan sa sulod sang mga patyo.
